鴉片（Opium），舊時叫做洋藥，俗稱大煙、阿芙蓉（阿拉伯語 Afyūm），清朝時代普遍會叫佢做福壽膏；佢係屬於天然麻醉抑制劑；醫學上可以用嚟做麻醉性嘅鎮痛藥，如果唔係用嚟做科學研究或者唔係醫藥用嘅話，咁就屬於毒品嘅一種。
以毒品嚟講，傳統用鴉片嚟吸毒嘅工具有煙簽、煙燈、煙槍等，一般將生鴉片加工變成熟鴉片，然后搓到細細粒丸咁或者細細條，喺火上面燢到佢變軟之後，就塞入煙槍嘅煙鍋入面，跟住將個煙鍋倒轉擺喺火苗上面燒，經過條煙管就可以吸食燃燒產生嘅鴉片煙；吸毒嘅人裡頭，煙癮唔大嘅每日大概吸食10～20次，大煙癮嘅可以多到一日吸成百次；依家嘅吸毒者通常直接就咁吞食嗰啲含有鴉片嘅丸仔，或者將鴉片溶喺水裡面直接用針進行靜脈注射；有時一大班人一齊以靜脈注射形式服用鴉片，但係又會共用嗰一兩支針筒，咁就成為咗愛滋病（A.I.D.S.）傳播嘅主要途徑之一。喺中國大陸如果發現有人販賣鴉片，而身上搜出嘅鴉片重量超過一千克（kg）即可判處死刑。

鴉片嘅提煉
鴉片其實係喺罌粟未熟嘅果實皮裡面提煉出嚟；罌粟係屬於一年生嘅草本植物，啲人會喺佢嘅果實未熟嘅時候，喺果皮上面割開小小切口，等啲帶白色嘅乳汁流出嚟，然後將哩啲液汁乾燥凝固再用嚟提煉；哩啲凝固物裡面含有多種鴉片生物鹼，而所提煉出嚟嘅鴉片會分為生鴉片同埋熟鴉片。
生鴉片係深啡色，有啲品種就會近黑色；形狀多數整成圓餅形，或者一磚磚咁；一般嘅表面會係乾燥同埋脆硬，但係裡面就保持住柔軟同埋粘性，氣味亦好刺激性好難聞－－－係好似放咗好耐嘅尿咁嘅苦味。生鴉片裡面除咗15%至30%嘅礦物質、樹脂同埋水份之外，仲含有10%至20%嘅特殊生物鹼。
哩啲生鴉片經過燒煮同埋發酵嘅加工處理之後，就會成為吸毒者使用嘅熟鴉片。整好嘅熟鴉片多數係條形或者一塊咁，然後用薄嘅布或者塑膠紙嚟包裝；熟鴉片嘅表面光滑柔軟，帶少少油膩，色澤會係淺啡或者金黃色，而佢所發出嚟嘅強烈味道，對啲吸毒者嚟講會係一啲香甜嘅味道。