港鐵巴士同埋港鐵接駁巴士（以前叫九鐵巴士）係香港鐵路有限公司轄下接駁或輔助巴士服務嘅簡稱，於1985年9月9號開始運作，吸引離鐵路車站較遠嘅乘客去東鐵綫、西鐵綫或輕鐵車站轉車。
喺兩鐵合併後，港鐵公司將九鐵巴士分為港鐵巴士同埋港鐵接駁巴士，港鐵巴士係指西鐵綫同埋輕鐵嘅接駁巴士及輔助巴士路線嘅統稱；而港鐵接駁巴士係指由九巴營運嘅東鐵綫接駁巴士路線。
當時嘅接駁巴士服務由九廣鐵路公司嘅單一部門負責營運，叫九廣巴士。到2003年西鐵通車，各部門重新調整之下東鐵同西鐵嘅接駁巴士服務由兩條鐵路嘅營運部門各自負責。自此接駁巴士再冇單一嘅巴士營運部門。
港鐵採用綜合收費系統，鐵路乘客持有八達通而轉接駁巴士或者搭接駁巴士之後轉鐵路，車費低啲嗰一程可獲免費優惠（K12假日班次、A73及K73P線除外）。若果乘客只係搭接駁巴士而唔搭東鐵、西鐵或者輕鐵，就要畀巴士車費。

港鐵接駁巴士（東鐵綫）
1985年9月9號，九鐵開辦咗兩條東鐵接駁巴士線，分別係K11（沙田第一城↔銀禧花園，經火炭火車站）同埋K12（八號花園↔大埔墟火車站）。不過最初開辦嗰時，九鐵並冇自己嘅巴士車隊，而係租旅遊巴士嚟行，一年後嘅9月1號就改為租九龍巴士（九巴）嘅巴士嚟行，直到1987年9月1號，先至用自己買嘅巴士行。
由於K11同K12唔使錢，乘客可以在任何時候免費上車，反應非常理想。因此九鐵再開多幾條接駁巴士線去應付客量，佢哋分別係K14（大埔中心→大埔墟火車站）、K15（旺角火車站↔中港碼頭）、K16（紅磡車站↔尖沙咀中間道）、K17（富善邨↔大埔墟火車站）、K18（廣福邨↔大埔墟火車站）。
其中K15喺運作初期更係由九鐵、香港小輪同信和集團聯合經營，主要係宣傳中港城（因為中港城係信和集團起嘅），同埋接駁中港碼頭（當時，香港小輪係嗰個碼頭嘅主要使用者）。到1990年，K15改由九廣鐵路公司自行營辦。另外由於的士團體認為K12嘅運作扼殺佢哋嘅生存空間，故此嗰時K12嘅尾班車喺夜晚9時就開。
大多數接駁巴士線嘅客量都係非常之高。不過，由於接駁巴士唔使錢，同時法例並無容許九鐵開辦收費嘅巴士服務，結果俾好多非東鐵乘客濫用。為解決呢個問題，九鐵由1999年5月3號開始，批出特許經營權畀九巴，由九巴租九鐵嘅巴士同埋司機，而車費收益歸九巴所有。自此，接駁巴士線成為專利巴士線，可以向乘客收費，並通過八達通系統繼續畀東鐵乘客免費接駁優惠，並同時享受政府畀九巴嘅燃油稅優惠。喺新安排下，濫用情況得到明顯改善；但同時，K15因為乘客大多數係非東鐵乘客，結果客量大幅下跌。而K15喺2001年6月3號改經海泓道（富榮花園、海富苑），以擴展服務範圍。
K12原本淨係喺平日提供服務，為方便東鐵乘客去大埔中心一帶，K12於2000年5月28號起增設假日服務。但由於的士團體認為噉做扼殺佢哋嘅生存空間，故此K12喺假日冇轉車優惠。另外，香港迪士尼樂園於2005年9月12號啟用，九鐵公司亦有意染指迪士尼嘅交通市場。本來，九鐵公司只係租非專利巴士來往上水火車站同香港迪士尼樂園，以套票形式（羅湖去上水嘅東鐵車飛加上水去香港迪士尼樂園嘅巴士車飛）出售，不過的士團體認為九鐵公司噉做係扼殺佢哋嘅生存空間而反對。亦有北區區議員認為巴士線喺北區上落，但唔畀北區居民搭係唔公平。後來九鐵公司推出本地乘客都可以用嘅套票（仍然一定要連埋車飛一齊買，東鐵同馬鐵都喺上水站轉巴士，西鐵就喺錦上路站），但因為嗰條巴士線客量低兼且嚴重虧蝕，最終喺2007年11月1日起停止服務。
其後九鐵公司推出同海洋公園合作嘅類似套票，由於班次更多，反應亦更好。2007年初，九鐵將同海洋公園合作嘅套票推廣活動改為永久計劃，不設期限。
西鐵喺2003年12月通車，但西鐵只係去到南昌站，結果九鐵安排K16延長到南昌站以接駁西鐵乘客去尖沙咀，並伸延至假日都有服務。由於來回程都經海泓道，同K15重疊，加上K16班次比K15密，於是K15自2004年1月4號起取消，並以專線小巴路線79K取代。
馬鐵就喺2004年12月通車，最受影響嘅係喺沙田區服務嘅K11。由於馬鐵可以服務該區，故此九鐵公司取消免費轉乘優惠，繼而乘客量大跌，到2007年1月15號K11被取消。

史
現時，九巴向港鐵租用巴士營運5條東鐵綫接駁巴士線，包括：
註：K12線於2000年5月28號起增設假日服務。但由於的士團體認為噉做扼殺佢哋嘅生存空間，故此K12喺假日冇轉車優惠，所有乘客（包括東鐵全月通）喺星期日及公眾假期搭呢條線都要畀正常車費。

路線

港鐵接駁巴士（西鐵綫同輕鐵）
輕鐵嘅接駁巴士服務喺1988年輕鐵投入服務時開辦。由於政府立法喺大欖涌至凹頭嘅青山公路之間、屯門同埋元朗設立「輕鐵專區」（原本係由1988年開始為期20年，早期重唔畀九巴接載區內乘客，到1993年放寬呢個限制），唔畀九巴開辦「輕鐵專區」內嘅區內巴士線。但部分屯門、元朗區內嘅鄉郊地方並唔適宜行輕鐵，故此有需要由九鐵開辦接駁巴士以應付輕鐵路線以外嘅交通需求。因此，輕鐵接駁巴士同東鐵接駁巴士唔同，由於有「輕鐵專區」嘅關係，故此法例容許九鐵喺「輕鐵專區」開辦收費嘅接駁巴士線，呢個係東鐵接駁巴士做唔到嘅。喺開辦初期，呢啲巴士以接駁輕鐵為主，到2003年12月西鐵啟用，九鐵重組輕鐵接駁巴士線，以方便乘客轉西鐵。
同東鐵綫接駁巴士另一個唔同嘅係輕鐵巴士一開始已經分為「接駁巴士」（路線編號原本同輕鐵一樣係三位數，後來改為 K 字頭）同埋「輔助巴士」（編號係 A 字頭）兩種。前者嘅目的在於服務因輕鐵專區而取消原有九巴路線，但輕鐵去唔到嘅地區；故此如果喺搭輕鐵之前或者之後搭接駁巴士，嗰程車免費。輔助巴士在於服務輕鐵去到，但因路線同原有巴士線唔同，較難服務嘅地區（例如屯門新墟、置樂花園一帶）；輔助巴士並冇轉駁優惠，要畀全程車費。

史
現時港鐵營運15條輕鐵／西鐵綫接駁／輔助巴士線，包括：
註：K73P 線係2006年10月9號起開辦嘅晨早特別服務，接載因輕鐵取消路線761而多出嘅乘客。由於九鐵公司唔夠車用，故此租用冠忠邨巴以提供服務，故此不設任何轉乘優惠，即使係用西鐵全月通或西鐵自悠通嘅乘客都要畀正常車費。

路線
九鐵鐵路公司曾經開辦兩條屋邨巴士線，一條係1980年代開辦，來往策誠軒（大埔滘九鐵職員宿舍）同埋大埔墟火車站嘅50R（又叫NR50），2005年8月21號起改由陽光巴士營運。另一條係1990年代開辦嘅95R（NR95），來往元朗朗屏邨同上水火車站，呢條線亦由2002年起改由另一間旅遊巴士公司營運。

屋邨巴士服務

租車
九鐵喺2007年1月12號宣佈斥資大概5,500萬蚊，向Alexander Dennis買20架符合歐盟四型廢氣排放標準嘅環保巴士，包括9架Enviro 500雙層巴士同埋11架Enviro 200 Dart單層巴士，以取代即將喺2008年退役嘅利蘭奧林比安11米冷氣巴士同埋三菱MK117J單層冷氣巴士。當中11架Enviro 200 Dart單層巴士更係首次引入香港嘅。
首批共9架Enviro 500雙層巴士由2007年11月底開始運到香港，並將於2008年投入服務，而另外11架Enviro 200 Dart單層巴士將於2008年9月中付運抵港。