黃家駒（Wong Ka Kui，日本發展嗰陣改過日本名Koma，1962年6月10號—1993年6月30號），鄉下喺廣東嘅台山，係香港好出名嘅搖滾樂隊 Beyond 嘅主音同埋結他手，亦都係樂隊低音結他手黃家強嘅二哥。中五畢業之後，曾經做過辦公室助理、五金、冷氣、水電工程、電視台佈景員等等，甚至入過樂隊鼓手葉世榮做嗰間公司度做保險經紀。
黃家駒讀初中嗰陣因為朋友嘅影響鍾意咗歐西流行音樂，17 歲嗰陣仲因為隔離屋搬走留低咗支結他，而令佢同哩種樂器結下不解之緣。1980年代初，黃家駒由琴行老闆介紹識咗葉世榮，發覺大家咁啱都鍾意一樣嘅音樂，於是同埋兩個朋友鄧煒謙（又叫鄔林，英文名 William），仲有李榮潮一起夾樂隊，哩個就係 Beyond 嘅雛型。1983年 Beyond 正式組成，經過幾次成員變動，期間低音結他手黃家強，同埋主音結他手黃貫中先後加入，開咗「永遠等待音樂會」同埋出咗盒帶《再見理想》之後，終於有經理人睇得起佢哋而入咗樂壇。
響 Beyond 成立頭十年發表嘅歌，大部分都係黃家駒寫同埋唱嘅。除了經樂隊發表歌曲，黃家駒都會寫吓歌畀其他歌手，曾經唱過佢寫嘅歌嘅歌手包括許冠傑、譚詠麟、麥潔文、王靖雯（王菲）、蔡興麟等。
黃家駒係樂隊中嘅靈魂人物，好敢講說話，有時仲會講啲大膽的嘢，所以有時令娛樂圈裡面嘅人唔妥佢。但係佢果斷、多嘢講的性格，亦都令佢成為樂隊嘅發言人同埋領導人物，帶領 Beyond 闖到好多個高峰。經過好多年嘅努力，Beyond 成為咗香港最舉足輕重嘅樂隊之一。由於對香港樂壇失望，而且希望樂隊能夠衝出香港，所以響1990年代初期，Beyond 決定發展東南亞、台灣、日本等嘅市場。
可惜1993年6月24號凌晨，樂隊喺日本東京富士電視台錄影遊戲節目嗰陣出咗意外，黃家駒唔好彩喺約莫三米高嘅台跌咗落嚟重傷暈咗，入咗醫院六日之後響當地時間下晝 4 點 15 分過身，死嗰陣只有 31 歲。之後佢嘅遺體葬咗喺將軍澳華人永遠墳場，另外九龍塘省善真堂都安咗佢個靈位，直到而家仍然成日有歌迷過去拜佢。
黃家駒過咗身之後，對香港甚至中國大陸後生嘅歌迷影響仍然好深。而 Beyond 其他成員都繼承咗佢嘅遺志，用樂隊嘅名出咗好多隻碟，直到2005年先至正式宣佈解散。黃家駒對香港樂壇嘅貢獻已經得到大眾嘅認同，香港郵政喺2005年11月8號出咗嘅「香港流行歌星」郵品系列裡面，黃家駒係其中一個獲致敬出郵票的歌手。

做過嘅戲

香港新城電台「1992年度勁爆作曲人」（得獎作品：《長城》）
香港電台「無休止符紀念獎」（1993年度）
香港電視廣播有限公司「1993年度十大勁歌金曲──榮譽大獎」
商業電台">香港商業電台「叱咤殿堂十大至尊作曲人」（1997年度）