如果係講周星馳自導自演嘅戲，去睇《功夫》。
功夫係由打交發展出來嘅運動。功夫同打交唔同之處，就係每一套功夫都好著重博擊嘅技巧，有一定招式同埋好多技術串連其中，要有攻亦有守，可以見招拆招，哩啲都需要練習先會成功嘅；而打交係完全唔駛章法，唔駛講技巧，總之你一拳我一腳，打贏打輸就要睇吓邊個夠體力頂得住嘞。
練功夫一定要練基本功，因為功夫講求體力好，馬步穩，起手有勁，作為功夫嘅基礎，基本功係需要經常練習，有咗健全嘅基本功，甚至可以發展出自己嘅一套獨門功夫。
嵩山少林寺被譽為功夫嘅發源地，自古有句說話叫做「天下武功出少林」其實並冇誇張，因為少林主張每種功夫都要由最根本練起，冇根基自然唔會有更高更深嘅武學。佢哋除咗提倡修身之外，修心性亦都係練武之人要學嘅好重要一環，所謂招由心生，仁者出手留三分，惡者出手不留人，以武救人，或者以武害人，就要睇練武人嘅心性係點囉。
更高層次嘅功夫嚟講，除咗馬步起手之外，好多時仲要講求眼明，耳聰，手快，步靈，甚至要以心感招；而功夫仲會分好多唔同嘅打法，關於用手腳嘅有拳法，爪法，腿法，仲有借助外物嘅好似劍法，刀法，棍法，槍法……等；每套功夫都有佢嘅長處，都有佢剋敵嘅利害，所以功夫哩門學問其實真係好博大精深。
今日練功夫嘅人旨在用嚟強身健體同埋自衞用，絕對唔主張撩事鬥非，門派與門派之間亦唔會再有門戶之見，開心見誠咁論武，希望中國嘅武術可以更加發揚光大；而且間唔中仲會有國際性嘅武術比賽俾一眾嘅練武人聚首一堂，展演所學嘅武藝。