荔枝角係香港新九龍一個區，響長沙灣西面。荔枝角原本係海角，不過家下出面填晒海，已經睇唔到角。角嘅位置係響家下荔枝角羈留所，連住嘅山都係角嘅一部份。而隻角就係長沙灣呢個海灣末端。家下荔枝角同長沙灣就以蝴蝶谷道為界。近荔枝角道頭有條渠做分界。
荔枝角西面，原本都係個海灣，叫荔枝角灣，呢個灣響一步步填晒。香港政府未發展長沙灣已經發展荔枝角，而且響荔枝角灣兩角對出填海。荔枝角裏面有一個全港最大嘅私人屋邨，美孚新邨，全條邨都響填海地上起嘅。塊地原本係美孚油庫(之前叫標準石油)。而灣西角就係魚雷庫。
荔枝角灣佢最後都係填平埋。過咗個灣，就係葵涌地界。不過荔枝角灣對上個山，雖然葵涌界內，但係因為無乜大村落，所以亦曾經當係荔枝角，荔景邨個荔就係指荔枝角，家下瑪嘉烈醫院地址都係寫荔枝角。