菲律賓鱷（Crocodylus mindorensis）係一種只分佈響菲律賓嘅鱷魚品種，亦都叫做緬多羅鱷魚 Mindoro crocodile 或者菲律賓淡水鱷 Philippine freshwater crocodile。喺菲律賓，雖然嚴禁捕殺依種鱷魚，但佢哋嘅分佈地正受到不斷開發同非持續性捕魚方法，例如魚炮，現時有關佢嘅保育工作係由荷蘭 / Filipino Mabuwaya 基金會負責。
以前曾被稱為佢係新畿內亞鱷（Crocodylus novaeguineae）嘅亞種，雖然同灣鱷有著相同嘅分佈，但體型就比唔上灣鱷。佢哋嘅野外數目唔多於 500 - 1,000 隻，同其他鱷魚相比，菲律賓鱷嘅口鼻部比較闊，身型亦都較細隻，通常唔超過3米，而雄性一般比雌性大隻，依種鱷魚嘅攻擊性唔算太強，但如果受到騷擾就會咬人。
同其他鱷魚一樣，菲律賓鱷都係一種得人驚嘅捕獵者，捉啲好似羚羊咁大隻嘅獵物，但又會畀鱷魚鳥去清理佢嘅棚牙，細隻嗰陣就食魚、蝦、老鼠同水蝸牛。
國家地理頻道早排拍咗一套叫 Dangerous Encounters 嘅生態節目，係由鱷魚專家布箂迪‧巴爾博士 (Dr. Brady Barr) 做節目主持人，響依一輯節目講述，巴爾博士係世上第一個見過晒全球 23 種鱷魚嘅科學家，而菲律賓鱷係比較特別嘅一種，好彩嘅係，佢見到一條只有兩個禮拜大嘅菲律賓鱷，菲律賓鱷有著金中帶啡嘅顏色，當佢哋成年時顏色會變深。