烏龍波，又可以講成擺烏龍，係足球嘅術語之一，意思即係話，當一場賽事進行緊嘅時候，一個球員好唔小心咁將個波送咗入自己嘅龍門而令到己方球隊失分。家陣好多講波佬都會將烏龍波通俗咁講成「擺老烏」或者「送大禮」。
做出哩種失誤嘅多數係返嚟自己龍門前回防嘅球員，有時為咗即時化解敵方密集嘅攻勢，於是守方球員諗住用頭或者用腳解圍，點知判斷錯誤變成將個波改變方向飛咗入龍門裡面，令到自己方面嘅守門員都欲救無從而失分，哩個擺烏龍嘅情況係最普遍；
但有時誤會亦都會存在於己方嘅球員同守門員之間，例如守方球員以為己方嘅門將喺自己後面，諗住輕鬆將個波撐龍舟俾佢，點知原來個門將唔為意接唔到而俾個波漏入龍門。有個關於誤會嘅實例發生喺2006年世界盃足球賽其中一場英格蘭嘅賽事入面，後防球員加利尼維利諗住後防冇哂威脅，於是喺大禁區角位外將個波大腳回後返俾守龍門嘅門將拉爾拿，點知拉爾拿出嚟諗住用腳輕鬆將個滾地波控定之際，個波突然俾草頭彈高避過咗佢隻腳，一直跳跳彈彈咁滾入龍門，令到英格蘭無端端失咗一球俾對手。
另外一個英超嘅經典烏龍波就係發生喺阿士東維拉嘅守門員安格文身上，當時後防球員美爾寶喺龍門右方界外大力咁掟返個界外球入去俾安格文，點知安格文伸腳想接波時個波輕輕點一點佢隻腳後繼續彈入龍門，佢輸咗哩個波之後直頭無哂表情，仲俾衝入球場嘅對手球迷（伯明翰球迷）拍佢塊面嚟嘲笑，成為當時英超球壇嘅一單笑料。
當然烏龍波都可以係守門員自己一個人造成，不過例子就比較少。