《天下無賊》係中國同香港合作嘅電影作品之一，係喺2005年農曆新年嘅賀歲電影。

背景及簡介
喺大有錢佬劉總裁屋企，英語老師王麗喺度教緊劉總英文">英文，點知哩個劉總見王老師幾靚女，就襯老婆唔喺屋企想乘機侵犯，點知俾一直暱喺廁所嘅王薄用攝錄機偷拍哂；原來王薄同王麗係一對雌雄大盜，佢哋影底咗劉總想偷食嘅罪証，成功咁敲詐咗一架寶馬房車。
佢哋兩個駕住哩架寶馬一直穿州過省，想話賣咗佢賺返一筆錢；沿途上王麗突然提出話想收山唔再做賊，但王薄反對。當佢哋駕車去到青藏高原一個廟城附近時，王麗想落車去拜拜神，王薄亦無不可，就陪咗佢入去。王麗一個人虔誠參拜，但係王薄就好似入咗寶山咁，將嚟到參拜嘅善信袋裡面嘅手提電話">電話同埋財物都偷哂喺手；期間遇到個冷艷女子都喺度偷緊嘢，於是王薄就上前去挑戰，仲乘機偷走咗哩個女子啱啱偷返嚟嘅手機。離開之後，王薄向王麗展示成袋嘅戰利品，但係王麗想積陰德唔想再做賊，於是提出要同王薄拆伙，王薄一怒之下就將王麗放落車，賴底佢喺高原度就自己駕車走咗去。
王麗一個人喺一片荒漠度四圍蕩，一個早前喺廟城度幫廟宇翻新嘅小師傅傻根踩住單車經過，見到王麗口乾求救，於是落車俾水佢飲，仲載佢去到近城鎮嘅地方；落車時王麗諗住俾啲錢傻根多謝佢，傻根拒絕不特止，仲送咗個高僧送俾佢嘅降魔杵吊墜俾王麗保平安。
傻根係一個正直嘅青年，十六歲就憑住家傳手藝嚟到廟城跟一個鄉里大叔做修揖廟宇嘅工作；佢覺得自己已經廿一歲，係時候要返鄉下成家立室，於是問一直照顧佢嘅大叔一路以嚟嘅工作賺咗幾多錢，大叔搵會計計過條數，話幫傻根儲咗六萬元人民幣，傻根就要求大叔幫佢提款，俾佢拎啲錢返鄉下起屋娶老婆。大叔拎住包錢俾傻根，提議傻根搵郵局幫手送錢返鄉下，但係國家規定運錢郵費要收總額嘅一個巴仙(1%)，咁即係大概六百元；傻根覺得六百元可以買隻驢仔拉吓車推吓磨，點解要無端端將啲血汗錢俾人，於是想自己親手帶住啲錢返去，但係大叔話沿途會有好多賊好危險，隨時會俾人搶哂啲錢，可惜傻根個人太直，覺得哩個世界唔會有咁多賊，冇咁容易俾人打劫，於是一意孤行咁帶住啲錢起程。
幾個大叔送傻根去到火車站，傻根因為唔信會有咁多賊，傻到喺月台大嗌叫賊嚟搶佢袋裡面嘅錢，點知撞到王麗同王薄；王薄已經賣咗架寶馬，因為唔放心王麗一個人，於是就跟咗佢嚟火車站，仲應承以後會同佢形影不離。王薄同王麗一聽到傻根身上面有巨款，於是即刻要傻根跟住佢哋一齊坐，不過喺兩個人嘅心裡面，其實各自嘅諗法已經有所不同：王薄想將傻根嘅錢據為己有，但係王麗覺得傻根係正直嘅人，希望沿途可以保護佢唔好俾其他人搶走佢啲錢，後來仲認咗佢做契細佬（義弟）。不過哩個時候，傻根先前大叫搵賊嘅愚蠢行為除咗俾王薄王麗知道佢身懷巨款之外，亦已經招惹咗另一班假扮旅行團">旅行團嘅爬手集團嘅注意。
火車離開咗車站，而喺火車嘅貴賓包廂裡面，一個冷艷嘅年輕女子正喺度幫一個老人家清除緊佢嘅面部化粧，佢就係先前喺廟城度俾王薄反偷手提電話">手提電話嘅女賊，叫做小葉；而嗰個老人家嘅化粧清除咗之後，露出嘅係一副威嚴兼且帶啲奸狡嘅中年男人面孔，原來佢就係哩班扮扒手集團中嘅最高領導賊頭子－－－胡黎，因為佢嘅扒竊手法十分高明兼且乾淨利落，因此同道中人都會尊稱佢做黎叔。黎叔因為之前俾王薄發現咗佢假扮老人家嚟接近傻根，覺得王薄有啲料子係一個可用嘅人才，所以傳令俾手下知叫佢哋哩程車裡面都唔好再搞傻根，想藉住順水人情（將傻根嘅錢讓俾王薄）嚟招攬王薄幫佢賣命。
黎叔嘅手下雖然得到命令哩趟車唔准「打獵」，但正所謂「聞到肉香嘅狼，點會唔發狂」，面對咁大隻肥羊，終於忍唔住而要出手；賊二哥胖子聯同黎叔愛將四眼一齊出動，襯住傻根行咗出嚟通道去廁所，先先整到好唔覺意咁將杯好熱嘅滾水潑喺傻根身上，然後詐諦要幫傻根換衫，再乘機偷傻根袋裡面用羊皮紙包住嘅錢，好彩哩個時候王薄及時趕到一手按住個袋，而四個人就喺一個狹窄嘅通道裡面推來攘去，當王薄同兩個賊幫過咗幾招得勝之後，啲錢幸保不失，王薄同傻根兩個安然咁返返埋佢哋嘅卡位。
坐喺王薄佢哋另外一邊卡座嘅係一個男嘅畫畫老師同埋佢嘅一個女學生，突然間畫緊畫嘅畫畫老師發現唔見咗個銀包，而其實佢個銀包一早喺車站就俾王薄扒咗，於是大嘆倒霉。傻根睇到人哋俾賊仔偷咗嘢雖然都覺得無奈，但係佢仍然覺得哩個世界係唔會有咁多賊，因為佢覺得，之前喺高原嗰陣成日都對住啲狼同佢哋傾計，啲狼都冇襲擊佢，仲建立咗微妙嘅友誼；連出名嗜殺嘅狼都唔會傷害佢，所以佢覺得：唔通人仲會衰得過狼？
王薄唔抵得班賊出手挑釁，於是拎住隻熟蛋走入貴賓餐廂諗住搵黎叔佢哋，咁啱黎叔同小葉，胖子同四眼喺度食緊嘢，於是王薄搵咗斜對面嘅一個位坐低，洋洋自得咁向黎叔露咗一手「空杯退蛋殼」，黎叔好欣賞咁坐埋咗王薄張檯，亦表演返一手「指甲批生蛋殼」，技術更高超；黎叔借住機會提出要王薄跟佢搵食，但王薄話自己不嬲係獨行俠，所以拒絕，仲當場篤咗胖子同埋四眼出嚟，話佢哋冇照黎叔命令出咗去「打獵」。返到貴賓車廂，黎叔發哂脾氣要責怪四眼，點知原來四眼都係聽到胖子講話係黎叔吩咐先咁做，黎叔心裡有數，但係念在兩個都幫得手，就冇去罰佢哋。不過黎叔覺得，既然王薄唔肯為佢賣命，班兄弟又忍唔住手，於是直頭吩咐小葉出動去扒傻根嗰六萬元。
深夜時份，普通車廂裡面差唔多個個都瞓哂，小葉嚟到坐咗喺畫畫老師後面個位預備郁手，佢將點著咗嘅唇膏頭彈咗入一個男人嘅衫袋裡面搞到係咁冒煙，嚇到個男人紥醒大叫火燭；哩個時候王薄唔喺位，得返王麗同傻根一齊，傻根見有人喊火燭就自告奮勇衝過去滅火，王麗按佢唔住，混亂間傻根袋裡面嗰舊錢就俾小葉掉咗包變成咗包紙巾。小葉扮成大肚婆諗住避開王薄王麗嘅耳目，點知都俾王薄識穿，過咗幾招之後王薄終於搶返包錢，小葉襯機會想勾引王薄，但係王薄始終唔過電。
因為保護唔到傻根嘅錢，王麗覺得好沮喪，王薄返到嚟就話既然傻根個身冇錢即係冇危險，不如落車唔好理咁多；中途站落車之後，王薄透露俾王麗知佢其實已經搶返包錢，勸王麗唔好理傻根，等佢面對現實唔好沉醉喺天下無賊嘅夢入面；王麗大發脾氣，於是話俾王薄知因為佢有咗BB，想積返啲德，所以先至去拜佛同埋保護傻根；王麗拎返包錢俾傻根，然後唔理王薄，自己同傻根上返車。火車又再開動，冇幾耐王麗個手提電話">手提電話嚟咗個短訊，王薄話：「有我在你放心。」
王薄一個人喺酒吧車廂坐，小葉就嚟挑釁佢，諗住同王薄比試，點知表面上贏咗王薄，其實就中咗王薄嘅迷藥圈套。後來胖子同四眼又嚟搵王薄比試膽量，佢哋走咗上車頂，王薄就提議大家企直，如果邊個喺架火車入隧道之前唔縮低頭就贏；胖子自己唔敢上，就叫四眼出戰，哩個時候黎叔靜靜雞喺上車頂嘅鐵梯度暗中睇住戰果，可惜四眼喺臨到隧道口嘅一刻就縮低咗頭，而王薄就輕描淡寫咁仰頭避過撞隧道頂嘅危險。不過當一出隧道之後，胖子唔抵得輸就向王薄偷襲，王薄一跌低黎叔突然出手，搞到王薄跣咗去車嘅一邊差啲跌咗落車，黎叔及時捉住王薄隻手，但係哩個時候架火車喺條鐵橋上面，而腳下就係好深嘅山谷；黎叔冇乘人之危，拉返王薄上嚟之後就同佢打賭，要喺架車到站之前將傻根嘅錢偷到手。
黎叔親自去到普通車廂，坐低喺另一面卡位陰陰咀笑咁望住王薄，忽然廣播話有人急需要大量血液，要搵人捐血，傻根又自告奮勇要去捐血，王薄冇佢符，於是就陪佢去；喺條通道行緊嘅時候，有個阿伯喺頭頂個架度攞嘢唔小心整跌咗個鐵水壺，眼見個水壼會跌中個嬰兒嘅頭上，王薄一伸手就接咗個水壼，但就喺哩個電光火石嘅一刻，佢同傻根嘅距離就拉遠咗；同一時間火車再次入隧道，喺冇乜光線底下王薄知道出事，佢發現傻根個袋得張紙話佢輸咗，就冇哂心機咁返埋位。點知四眼俾黎叔一睇嗰包錢就即變哂口面，原來成包都係陰司紙！黎叔認為王薄出古惑就好唔高興，正想離開普通車廂時，有三個幪面劫匪持斧頭同鳥鎗衝咗入嚟要打劫，點不知個肥劫匪搜畫畫老師個女同學嘅身時摸到把手鎗，先發現原來佢哋係反扒大隊嘅警察，跟住幾個劫匪連同一眾扒手集團全部俾警察拘捕哂，而原來三個幪面劫匪嘅領導就係一早懷有異心嘅賊二哥胖子。
貴賓車廂裡面，黎叔俾小葉出賣亦都俾警察捉埋，而王麗王薄就去到醫療室陪住因為失血而暈咗嘅傻根；反扒大隊隊長（畫畫老師）入嚟同佢哋表露身份，話已經知道咗佢哋係劫寶馬嘅通緝犯，除咗喺佢哋嘅行李度搜返個銀包出嚟，仲表示其實傻根包錢係佢喺滅火嘅時候掉包，講完就將舊錢塞返入傻根個袋入面。反扒隊長見佢哋都唔壞得哂，就由得佢哋係車廂裡面傾多陣，等車埋站先帶佢哋走。
王薄為咗唔想個仔係監獄度出世，於是襯車未到站，就帶住王麗喺天窗度出去諗住跳車走佬，點知喺車廂同車頂之間嘅通風槽度遇到想用同樣方法走佬嘅黎叔，只見黎叔手上拎住傻根包錢，原來佢襯王薄佢哋出咗嚟，就乘機用鐵勾勾咗包錢上嚟；王薄叫王麗走先，跟住返轉頭同黎叔決鬥，最終包錢亦物歸原主返返傻根身邊，哩個時候火車亦都到站。黎叔落車時化哂粧諗住襯亂逃走，但係最終都瞞唔過反扒隊長，俾人逮捕咗，而王薄就被發現死喺車頂嘅通風槽裡面，死因係俾支細鐵勾刺中頸部失血過多。
幾個月之後，喺北京嘅一間餐館裡面，少少見肚嘅王麗正喺度食緊北京片皮鴨，因為有咗身孕，所以食量特別大，係咁食係咁食；哩個時候反扒隊長嚟到，將王薄嘅死訊話俾王麗知，仲鼓勵佢唔好對個BB隱瞞老豆係咩人，因為，佢好欣賞王薄為傻根而付出性命嘅情操。